En il futur sa concentrar sin pli paucs accents

Thu, 12/06/2012
Radiotelevisiun Svizra Rumantscha

Per l’auter onn hajan ins reducì ils accents, ha ditg Marc Tischhauser, il manader dal project Program San Gottardo. L’idea saja da sa concentrar sin pli paucs projects ed uschia pudair realisar mintga project che vegnia prendì enta maun. Quai ha Tischhauser, ditg a l’emprima scuntrada da Program San Gottardo ad Ursera.

Durant la scuntrada ha Marc Tischhauser infurmà ils quatter chantuns involvids davart la lavur fatga l’onn current ed ils plans per l'auter onn.

L’onn 2012 haja il Program San Gottardo tranter auter realisà ina purschida pauschala per la senda da las quatter funtaunas. Ina senda da viandar che maina atras ils quatter chantuns a las quatter funtaunas dals quatter flum. Il Rain, la Reuss, il Ticino ed il Rodan. Il osp sa cudeschar in pachet cun hotels e tut quai ch’el dovra per quella tura.

Dar golf en la regiun dal Gottard
In auter project è la collavuraziun tranter las plazzas da golf da Sagogn, Breil, Dieni, Ursera e Goms. En il futur duain las plazzas da golf porscher in pachet ch’il osp po dar golf sin las differentas plazzas en la regiun dal Gottard.

Il Program San Gottardo 2020 vul unir ils quatter chantuns dal Gottard. Il Grischun, il Tessin, l’Uri ed il Vallais. Ils quatter chantuns duajan collavurar per che la regiun dal Gottard possia porscher attractivs spazis da viver e fermas regiuns economicas. (sm/gc/rtr)